دي اختصار جملة Extended Range Electric Vehicle يعني السيارات الكهربائية ذات المدى الممتد.
طب يعني إيه برده؟ يعني عربيات كهرباء بموتور كهرباء بيحركها بياخد طاقته من البطارية ولكن كمان العربية ليها مدى ممتد تقدر تاخده،
طب منين بقى؟
من موتور بنزين عادي موجود وظيفته مش تحريك العربية ولكن إنه يشتغل ويبدأ يشحن البطارية لما ينزل مستواها عن الـ٢٠٪ عشان يضمن أن
العربية مستمرة في الحركة وكمان قدرتها كاملة كقوة حصانية.
طب ولو أنا كل يوم مشاويري مش بنزل عن الـ٢٠٪ للبطارية...؟
ده كده ممتاز جداً ومعنى كده إن كل حركتك هتبقى بالكهرباء بس، يعني تانك البنزين موجود زي ما هو لما تحتاجه بس، وكمان يا صديقي
العزيز أنت عارف إن كده من الناحية الفنية أنت كمان كفاءة السير واستخدامك للبطارية اللي هي أصغر في الـEREV أفضل من العربية الكبيرة
في الحالة دي لو أنت كل اللي محتاجه في اليوم ١٥٠-٢٠٠ كم...؟
إزاي الكلام الغريب ده...؟
لأنك لو محتاج بس يومياً تستهلك ٣٠ ك.و.س من البطارية ومش محتاج الباقي فده معناه إن لو العربية مثلاً كانت ١٠٠ ك.و.س إن أنت معاك ٧٠
ك.و.س زيادة كوزن وكأنه Dead weight أنت مش مستخدمه وبالتالي كفاءة الاستهلاك لكل kWh هتكون أقل من إنّي معايا ٣٠ ك.و.س
والباقي تانك بنزين وزنه أقل لأن الـEnergy Density للبنزين أعلى بكتير من البطارية، فاختصاراً لو نمط حياتك كده وهتشحن كل يوم فأنت هتنبسط جداً.
الأجمل بقى لو مسافر، العربية هتديك مدى ٩٠٠ كم من الشحنة مع تانك البنزين وزي ما اتفقنا إن العربية اللي بيحركها موتور كهرباء يعني حتى
استهلاك البنزين هيكون أقل بكتير من لو استخدمنا البنزين مباشر وحرقناه عشان نحرك العربية، بالعكس أنت كده زودت الكفاءة ٣ أضعاف
أفضل من الحرق مباشر للحركة.
ومش بس كده، طب أفرض أنت سفريتك ٥٠٠ كم ومش عايز برده أستخدم بنزين خالص هعمل إيه؟ هتقف في أي محطة شحن سريع وتشحن
عادي جداً وتاخد ٢٠٠ كم زيادة، يعني إجمالي عملت ٤٠٠ كم بالكهرباء والـ١٠٠ كم الأخيرة هي بس اللي استهلكت بيها بنزين.
طب رحت المحطات ولقيتها زحمة وطوابير وناس بالإدابتور ومستنين بعض وبيحضروا دكتوراه إزاي هنشحن سريع، ولا يهمك أنت هتكمل عادي على الـExtender بالبنزين.
طب إيه الحاجة الوحيدة اللي هتحتاج تعملها مع الـEREV...؟
صيانة كل ١٠ آلاف كم للموتور بتاع الـEREV يعني بند الصيانة موجود للموتور البنزين واللي أعتقد إنك لو مش هتستخدم كتير العربية ممكن
تقعد أكتر من غير الصيانة دي (لسه مش متأكد) ولكن لأنك بتعاملها ككهرباء فقط... ولكن بشكل عام
استهلاكك للبنزين بقى أفضل كتير جداً
جداً جداً لإنها في النهاية كهرباء بموتور بنزين للشحن في حالة الاحتياج فقط.
الفكرة دي موجودة في Nissan X-Trail e-power ولكن بسعر كبير جداً عليها ومش كهرباء لإن بطاريتها صغيرة جداً حوالي ٦ ك.و.س فقط
واعتمادها الأساسي على حرق بنزين لشحن البطارية طول الوقت وتوليد كهرباء وهنا البطارية دورها Buffer مش Energy Storage وكمان
سعرها عالي جداً جداً فكده دي أول ضحية معانا 😅
والعربية الصينية S05 غبور منزلها بـ ٨ سنين ضمان على البطارية و ٦ سنين على العربية أو ٢٥٠ ألف كم على كل العربية بشكل عام.
ودلوقتي بقى نيجي للنصيحة الأخوية لمتابعينا، ابدأ بص للعربيات اللي في نفس الفئة السعرية دي واللي ببروتوكول صيني وبدون ضمان
وحوارات في الشحن السريع وأدابتورات غير موثوقة أو اعتمادية، فهل بقى منطقي إنك تسيب المتاح بكل المميزات
دي وتفكر في حاجات تانية كده؟
هل أستورد أختر العربية دي من الصين بأقل ٢٠٠-٣٠٠ ألف جنيه بس لسه تشتريلها مبادرة وحوارات شحن وقصص إن احتمال يتلغي أصلاً
المواصفات الصينية استيراد وكمان بدون ضمان وعيش حياتك في قطع الغيار لو حصل حادث واحتجت حاجة من بره؟ أكيد مش منطقي برده
ومتقوليش الفرق ده إن وراك وكيل بالدعم وكل المميزات دي وكمان أوروبي والعربية تروح تستلم فوري متستاهلش الفرق ده.
أنا مش هقول مين باقي العربيات اللي للأسف مبقاش ليها مكان في السوق حالياً وصعب تبقى مغرية حالياً للناس، لأن كل وقت وله أذان
وبدأت حقبة جديدة بدخول الـEREV بشكل رسمي وبأسعار تنافسية كده.
تحياتي ليكم جميعا ولو أستفدت من المقالة متنساش تشير عشان غيرك يستفيد ❤
